Баннер
ШУМО ДАР / ВЫ ЗДЕСЬ : Тарбияи ҳарбӣ – ватандӯстӣ Ватандӯсти
/// Ташкилоти ҷамъиятии мададгори мудофиаи Ҷумҳурии Тоҷикистон бо захираву имкониятҳои кадриву зеҳнӣ, таҷрибаву амали ғаниву созандаи худ мададгори воқеии мудофиаи Ватан, мактаби тарбияи завқи техникию эҷодкоронаи насли наврасу ҷавон – соҳибони фардои дурахшони мамлакатамон ба шумор меравад. ///

Ватандӯсти: Ин арзи садоқат ба Ватан ва миллат аст

 

Ташкилоти ҷамъиятии мададгори мудофиа. Созмони меҳанпарастӣ ва манбаи тайёр кардани мутахассисони ҳарбӣ ва соҳибкасбони оммавии техникӣ, инчунин омодасози ҷавонон ба сафи Қувваҳои Мусаллаҳи мамлакат мактаби ҷасорат ва мардонагист.
Бо номи ин ташкилот ва кору пайкори ӯ бисёр саҳифаҳои, рангини таърихи навини халқи тоҷик равобит дорад. Қаҳрамониҳои беназир, номуси баланди меҳанпарастӣ, ҷасорату мардонагӣ, сафшиканию диловарӣ аз хислатҳои ҳамидаи ин Созмони мудофиавӣ мебошанд. Мо саҳифаҳои рангини таърихамонро варақ зада ифтихор аз он мекунем, ки бо ҳукми таърих Офаридагор чунин Ҷамъияти меҳанпарастро додааст. Нақши вай бахусус имрӯз, ҳангоме ки Тоҷикистони азизи мо дар баҳру бар соҳибистиқлол гардидааст ва ин чадидаро ҷаҳониён эътироф намуда дар пойтахту баъзе шаҳрҳои он сафаратхонаву консулгариҳо таъсис додаанд, хеле ва хеле калон аст. Ва ин Ташкилот асолати таърихи дорад.



Пеш аз ғалабаи инқилоби Октябри Кабир як қисми Осиёи Марказӣ бо номи Генерал-губернатории Туркистон вуҷуд дошт, ки ӯ тобеъи Русияи подшоҳи буда, қисми зиёди навоҳии шимоли Тоҷикистони имрӯзаро дар бар мегирифт. Навоҳии имрӯзаи ҷануби Тоҷикистон бо номи Бухорои Шарқӣ дар ҳайати Аморати Бухоро шомил мегардид. Соли 1924 дар асари ҳудудбандиҳои миллӣ-давлатӣ дар Осиёи Марказӣ ҷумҳуриҳои Ӯзбекистону Туркманистон ва ҷумҳуриҳои худмухтори Тоҷикистону Қирғизистон ба вуҷуд омаданд. Соли 1925 ВХБК ба Тоҷикистон ҳамроҳ карда шуд. Моҳи октябри соли 1930 вилоятҳои Хуҷанд (ҳоло Суғд) ба Тоҷикистон ҳамроҳ карда шуд ва Тоҷикистон чун ҷумҳурии ҳафтуми Иттиҳоди Шуравӣ арзи ҳастӣ кард.
Азбаски ин давлат дар ҳалқаи империализми ҷаҳонӣ қарор дошт, онро чун гавҳараки чашм ҳифз кардан лозим меомад. Баъди ҷанги шаҳрвандии Русия (солҳои 1918-1920) заҳматкашони мамлакат ба хулоса омаданд, ки бе синасипаркунии хеш, бе ёрии доимии ҳарбӣ ба Артиши Сурх ҳифзи Давлати коргару деҳқонро таъмин нахоҳанд кард. Барои ба ин ҳадаф расидан зарур буд, ки ҳамаи заҳматкашон донишҳои ҳарбӣ омӯзанд, машқу тамрин кунанд, худро аз ҳодисаҳои ҳавойӣ муҳофизат намоянд, ба Қувваҳои Мусаллаҳ ёрии моддӣ расонанд, агар лозим ояд, ба даст силоҳ гирифта алайҳи душман биҷанганд. Бо ҳамин андешаҳо заҳматкашони Русия бо ташаббусҳои гуногун баромад карда, ҷамъияҳои мухталифи муҳофизати Ватан барпо намуданд. Яке аз онҳо Ҷамъияти илмӣ-ҳарбӣ ном дошт, ки бо роҳбарии лашкаркашони бузург М.В.Фрунзе, К.Е. Ворошилов, С.М. Будёний, Н.И. Подвойский, Р.П. Эйдиман ва дигарон 13 октябри соли 1920 барпо карда шуд. Баъд яке паси дигаре чун ҷамъиятҳои Ташкилоти мададгори мудофиа, АВИАХИМ ва ғайра пайдо шудан гирифтанд.
Ҳадафи ҷамъияти АВИАХИМ, на танҳо дар байни оммаҳо вусъат бахшидани кори мудофиавӣ, балки ҳамчунин ёрии амалӣ расонидан ба тараққӣ додани соҳаҳои кимиёвӣ ва ҳавопаймоии мамлакат буд.
Ташкилотҳои мазкур ба забони оммафаҳм адабиёти ҳарбиро навишта миёни мардум паҳн мекарданд, онҳоро ба асосҳои донишҳои низомӣ шинос менамуданд, дар бораи илми ҳарбу зарб нақлу ривоятҳо карда ҳаваси ватанпарастии мардумро бедор менамуданд.
Аз ибтидои моҳи январи соли 1927 ягонагии мақсаду мароми ҷамъиятҳои ТММ ва АВИАХИМ-ро ба назар гирифта, онҳоро бо ҳам муттаҳид намуданд ва ба як созмони бузурги ватанпараст асос гузоштанд.
1-уми апрели соли 1927 дар ҳаёти сиёси, иқтисодӣ ва ҳарбии Тоҷикистон як тағйироти куллӣ ба амал омад. Дар ҷаласаи муштараки раёсатҳои ТММ ва АВИАХИМ қарор карда шуд, ки имрӯз дар Ҷумҳурии Тоҷикистон бо Созмони мудофиавӣ ва ватанпарастии ТММАВИАХИМ (ОСОАВИАХИМ) асос гузошта мешавад. Дар ҳайати Бюрои ташкилоти ТММ АВИАХИМ роҳбарони ҳизбӣ ва давлатӣ: Чинор Имомов, Нусратулло Махсум (Лутфуллоев), Абдураҳим Ҳоҷибоев, Абдулло Раҳимбоев, М. Гусейнов, С.К. Шадунс, В.Н. Герасимов,Т.Т. Шапкин ва дигарон иштирок доштанд.
Вақте ки ТММАВИАХИМ дар Тоҷикистон барпо карда шуд, вай дорои 34 ташкилоти ибтидоӣ (ячейка) буд, ки аз он ҷумла 24 ададаш дар муассисаҳо, 8 ададаш дар қисмҳои ҳарбӣ ва 2 ададаш дар хоҷагии қишлоқ вуҷуд доштанд. Дар ибтидои моҳи апрели соли 1927 ҷамъулҷамъ 678 нафар аъзо дошт.
Дар охири солҳои 20-ум ва ибтидои солҳои 30-ум ТММ ва АВИАХИМ дар паҳн намудани донишҳои ҳарбӣ миёни меҳнаткашони мамлакат, ташкили маҳфилҳои техникӣ дар байни аҳолӣ, дар амри ба амал татбиқ намудани тадбирҳои ҳарбӣ, таъмини ҳушёрии омма, тарбияи ҳарбӣ-меҳанпарастии мардум хеле корҳоро анҷом бахшид. Нақши ватанпарастии ТММ АВИАХИМ хусусан дар солҳои ҷанги Бузурги Ватанӣ (ҶБВ) бештар ҷилвагар гардид. Масалан, танҳо дар ибтидои солҳои 1941-1943, яъне дар дуним сол вай барои ҷабҳаи оташфишон беш аз 99 ҳазор нафар автоматчиён, пулемётчиён, фармондеҳони хурди ҳарбӣ, танкистон, ҳамшираҳои тиббӣ ва ғайра тайёр карда фиристод, ки онҳо ҳиссиёти баландтарини ватандӯстии хешро нишон доданд. Аз 55 нафар Қаҳрамони Иттиҳоди Шӯравии фарзандони Тоҷикистон аксарияти куллашон дастпарварони ТММАВИАХИМ мебошанд. Ташкилоти мададгори мудофиа имрӯз бо номҳои Қаҳрамонони Ватан Неъмат Қарабоев, Саидқул Турдиев, Домулло Азизов, Тӯйчӣ Эрйигитов, Сафар Амиршоев, Ҳодӣ Кенҷаев, Урунбой Ёқубов, Исмоил Ҳамзаалиев, Ҳайдар Қосимов ва бисёр дигарон фахр мекунанд, ки онҳо аз мактаби ҷасорату мардонагии вай гузоштаанд.
Дар солҳои Ҷанги Бузурги Ватанӣ самти муҳимтарини фаъолияти ТММАВИАХИМ-и Тоҷикистонро таблиғоту ташвиқоти донишҳои ҳарбӣ ба мардум, хусусан ба ҷавонон ташкил медод. Ин кор аз тариқи маҳфилҳои техникӣ, хондани лексияҳо, маърӯзаҳо, гузаронидани семинарҳо, конфронсияҳои илмӣ-амалӣ, сӯҳбатҳо, ташкили сафарҳо ба ҷойҳои таърихӣ ва шеваҳои дигар сурат мегирифт. Масалан, танҳо соли 1946 фаъолони Созмони мудофиавӣ ба аҳолӣ оид ба донишҳои ҳарбӣ 5225 лексияю маърӯзаҳо хонданд, ки онро 210469 нафар одамон гӯш карда барои худ баҳраҳо гирифтанд. Ғайр аз ин 27733 нафар аҳолии ҷумҳурӣ дар ин сол ба сафар ба ҷойҳои таърихӣ баромада, машқҳои ҳарбӣ карда, ба мусобиқаҳои варзишӣ машғул шуда, сатҳи донишҳои ҳарбии худро баланд бардоштанд.
Дар охири соли 1945 ТММАВИАХИМ-и Тоҷикистон дар сафҳои худ 4082 созмони ибтидоиро муттаҳид менамуд, ки онҳо 165755 нафар аъзо доштанд. Дар худи ҳамин сол дар ҷумҳурӣ 25322 тирандоз, 153 ронанда, 630 нафар мутахассиси радио тайёр карда шуданд.
Кормандони Созмони мудофиавии кишвар на танҳо барои ҷабҳаҳо оташфишон мутахассис тайёр мекарданд, балки худашон силоҳ дар даст алайҳи душмани манҳус меҷангиданд. Масалан, 125 нафар раисони кумитаҳои шаҳрӣ ва ноҳиявии Ҷамъияти мудофиавӣ, 147 тан фармондеҳони таълими ҳарбӣ, 152 нафар мураббиёни таълими ҳифзи ҳаводиси ҳавойи, 12 нафар раисони кумитаҳои вилоятии ТММАВИАХИМ, 4 тан раисони Шӯрои ҷумҳуриявии ТММ ва АВИАХИМ дар майдонҳои Ҷанги Бузурги Ватанӣ бо душмани қаттол қаҳрамонона ҷангида, шарафу номуси Тоҷикистонро ҳимоя карданд. Умуман 440 нафар кадрҳои Ҷамъияти мудофиавии кишвар ба ҷанги зидди душман рафта шараф ва нангу номуси ҷумҳурии азизамонро рустамона ҳимоя намуданд.
ТММАВИАХИМ дар ҷамъоварии пулу мол барои ташкили эскадрилияи тайёраҳои бомбаандоз, коллонаи танкҳо ва аслиҳаи дигар, дар ҷамъоварии либосҳои гарм, дастпӯшакҳо ва соири амвол ба сарбозони Ватан намунаи ибрат нишон медоданд.
Ин комёбиҳо ба шарофати тарбияи ҳарбӣ-ватандӯстии ҷавонон муяссар гардиданд. Мусаллам аст, ки Созмони мудофиавии Тоҷикистон ва роҳбарияти он хуб дарк мекарданд, ки тарбияи ҳарбӣ-ватанпарастӣ ҳаргиз таблиғоти мавсимӣ ва муваққатӣ набуда, балки кори душвор, тоқатшикан ва дурудароз аст. Бо ҷавонон дар бораи чӣ будани номуси ватану ватандорӣ, эҳсоси шарафи миллӣ кори ҳамешагӣ бурда, дар қалби ҳассоси онҳо чароғаки меҳру муҳаббат ба Ватанро фурӯзон кардан, аз ҳар мубаллиғ кори бузурги таблиғотӣ бурданро талаб менамуд. Бинобар ин Ҷамъияти мудофиавии кишвар кӯшишҳо ба харҷ медод, ки ин корҳо натанҳо дар нақшаи таблиғотии созмонҳои мудофиавӣ дохил карда шаванд, балки қисми таркибии кору фаъолияти доимии мактабҳои олӣ, техникумҳо, омӯзишгоҳҳо ва синфҳои болоии мактабҳои таълимоти ҳамагониро ташкил диҳад. Созмонҳои мудофиавӣ дар солҳои ҶБВ ба чунин шеваи корбарӣ муваффақ ҳам шуданд.
Меҳнати диловаронаи ҷанговарони тоҷикистонӣ ва коркунони ақибгоҳро Ҳукумат бо ҷоизаҳои сазовор тақдир кард. Бештар аз 55 ҳазор нафар ҷанговарон ва зиёда аз 55 ҳазор тан кормандони ақибгоҳ бо ордену медалҳо ва дигар нишонаҳои ҷавонмардӣ-ватандӯстӣ қадр карда шуданд.
Дар солҳои баъди ҷанг тамоми кору фаъолияти Ҷамъияти мудофиавии кишвар ба тайёр кардани мутахассисони ҳарбӣ барои Қувваҳои Мусаллаҳи мамлакат, тайёр намудани соҳибкасбони техникӣ барои оммавии техникӣ барои хоҷагии халқ, омода сохтани ҷавонон ҷиҳати хизмат дар сафи артиш, аз байни ҷавонон сабзонда ба камол расонидани беҳтарин варзишгарони дараҷаи байналмилалӣ, устодон ва номзадҳои ба устодони варзиши ИҶШС, беҳтарин ҳавонавардон-варзишгарони тайёраҳо, чатрбозон, парапланёрҳо, тирандозони моҳир, мотосикилронони номӣ, каратингронон ва ғайра равона карда шуда буд.
Лекин баъди ҷанг, аниқтараш соли 1948, ТММ ва АВИАХИМ ба се қисми мустақил: ДОСАРМ, ДОСАВ ва ДОСФЛОТ тақсим карда шуд. Аммо ин амал самараи чандон хуб набахшид. Вай дар бисёр мавридҳо зарбулмасали халқии ба ангушт табдил додани муштро ба ёд меовард. Чанде нагузашта раванди ҳаёти ҷамъиятӣ бесуботӣ, беназмӣ ва самарабахш набудани ин тасмимоти барғалатро баръало нишон дод. Мақомоти дахлдори мамлакат аз ин вазъ хулосаи даркорӣ бароварда, дар нимаи аввали солҳои 50-уми асри гузашта ташкилотҳои мазкурро ба як созмони ихтиёрии ҷамъиятӣ-ДОСААФ (Ҷамъияти Ихтиёрии Мададрасони Артиш, Авиатсия ва Новгонӣ-ҶИМААН) муттаҳид намуданд.
Ин тадбир сад дар сад дуруст ва ҳаётӣ будани худро собит намуд. Акнун ангуштон ба мушт табдил дода шуданд. Дар тӯли солҳои 50-80-уми асри пешин ҶИМААН ба созмони ҳақиқии умумихалқӣ табдил ёфт ва дар тамоми Иттиҳоди Шӯравӣ шӯҳрат пайдо кард.
ҶИМААН-и Ҷумҳурии Тоҷикистон дар ин солҳо ба тамоми гӯшаю канорҳои мамлакат реша давонд ва дарахти сершоху сербарги он дар ҳама ҷо меваҳои шакарин ба бор овард. Пойгоҳи моддӣ-техникӣ ва техникӣ-таълимии Созмони мудофиавии кишвар дар ҳар як шаҳру вилоят ва навоҳии Тоҷикистон барпо карда шуда буданд. Дар бисёр гӯшаю канорҳои Тоҷикистон биноҳои замонавии кумитаҳо, синфхонаҳои таълимии бо тамоми моделҳои техникаи замонавӣ, расму плакатҳо ва тренежёрҳо муҷаҳҳаз қомат афрохта буданд. Аксарияти ташкилотҳо, мактабҳо бо автодромҳо, танкодромҳо ва ғайра таъмин шуда буданд. Пойгоҳи моддӣ-техникии ҶИМААН-и Тоҷикистон дар ҳайати худ 50 адад бошгоҳҳои таълимӣ ва варзишӣ дошт. Натиҷаҳои ҳамин ғамхориҳо буданд, ки дар охири солҳои 80-уми асри гузашта ҶИМААН-и Тоҷикистон ҳар сол ба миқдори 10.000 нафар мутахассисони гуногунихтисоси низомиро барои Қувваҳои Мусаллаҳи мамлакат ва 30 ҳазор тан соҳибкасбони оммавии техникиро барои хоҷагии халқи кишвар омода карда мефиристод. Шумораи варзишгарони бо намудҳои техникӣ ва ҳарбӣ-амалӣ машқкунанда соли 1989 200 ҳазор нафарро ташкил мекард, ки аз он ҷумла 76 тан устодони варзиш ва 909 кас номзад ба устодони варзиши ИҶШС буданд.
ҶИМААН-и Тоҷикистон ба Ҷамъияти мудофиавии оммавӣ табдил ёфта буд. Соли 1989 вай соҳиби бештар аз 5400 ташкилотҳои ибтидойи буд, ки дар сафҳои худ 1 миллиону 600 ҳазор нафар аъзоёнро муттаҳид менамуданд.
Ташкилотҳои мададгори мудофиавии то ҳадди имкон тавонистанд, ки механизми иқтисоди бозориро омӯзанд, замин гиранд, кор кунанд. Ин имконият дод, ки онҳо пойгоҳҳои модди-техникии худро тақвият бахшиданд. Яке аз масъалаҳои муҳимтарине, ки Созмони мудофиавӣ ҳамеша машғули он аст, равнақ додани намудҳои гуногуни варзиши техникӣ ва ҳарбӣ-амалӣ мебошад. Ҷанг дар ин масъала ҳам бисёр нокомиҳо ба бар овард. Аксарияти техникаи варзиши ин намудҳо дуздида, як қисмашон вайрону валангор карда шуданд. Бисёр варзишгарони номӣ фирорӣ гардиданд, ё аз Тоҷикистон кӯч бастанд. Сарфи назар аз ин мо кӯшишҳо ба харҷ додем, ки ин намудҳои варзиши техникӣ ва ҳарбӣ- амалиро, барқарор намоем балки онро рушду такомул ҳам бахшем. Дар ин бобат нақши Бошгоҳи ҷумҳуриявии варзиши техникӣ (БҶВТ) хеле калон аст.
То соли 2002 ҳар сол як-як чемпионатҳои ҷумҳуриявии мотосиклронон барпо мегардид, барои гузаронидани мусобиқаҳои дигар имконияти моддӣ-техникӣ ва молиявӣ вуҷуд надошт. Аз соли 2002 ин ҷониб мо ҳар сол бахшида ба Наврӯзи Аҷам ва ҷашни солгарди ташкилёбии Созмони мудофиавии кишварамон мусобиқаи ҷумҳуриявии мотосикилрононро қотеъона барпо менамоем. Дар ин мусобиқа аксар ғолибони чемпионатҳои вилоятии Хатлон, шаҳру навоҳии тобеъи Марказ, махсусан шаҳри Турсунзода ва ноҳияи Ёвон фаъолона ширкат меварзанд. Имрӯз ғолибони ин намуди варзиш имконият доранд, ки дар мусобиқаҳои байналмиллалӣ низ иштирок намоянд. Масалан, соли 2005 мотосикилронони тоҷик дар чемпионати байналмиллалии мотосикилронон, ки дар Ӯзбекистон баргузор шуд, ширкат варзида, ҷойҳои 3 ва 5-умро ба даст оварданд.
Кумитаи Марказии ТҶММ барои дар мусобиқаҳои байналмиллалӣ иштирок кардани варзишгарони тоҷик 3 поя мотосикли ҷопонии фирмаи машҳури Судзукиро харида гирифт. Ҳоло дар назди раисони кумитаҳои ТҶММ вилояти Хатлон, Суғд, Кумитаи шаҳрии ТҶММ ш. Турсунзода, Мактаби муттаҳидаи техникии ҷумҳуриявӣ ва Мактаби техникии ш. Турсунзода вазифа гузошта шудааст, ки имконияти молиявии худро ба назар гирифта, чанд поя аз мотосикилҳои ҷопонӣ харидорӣ намоянд. Ба ин васила мо метавонем, ки пойгоҳи моддӣ-техникии варзиши техникиамонро мустаҳкам намуда, дар мусобиқаҳои байналмиллалӣ далерона ширкат варзем.
Бошгоҳи ҷумҳуриявии варзиши тирандозии мо (БҶВТ) дар Осиёи Марказӣ яке аз беҳтарин бошгоҳҳо маҳсуб мешавад. Вай 5 силсилаи бо аслиҳаи мухталиф тирпаронӣ кардан дорад. Алакай дар ин ҷо ду мусобиқаи байналмиллалии тирандозон бомуваффақият гузаронида шуд. Ин бошгоҳ ҳар сол бахшида ба ҷашни таъсиси ТҶММ мусобиқаи тирандозони ҷавони мактабҳои ш.Душанберо гузаронида барои онҳо чанд мукофот ҳам муқаррар кардааст. Беҳтарин тирандозони ҷавон аъзои дастаи БҶВТ интихоб карда мешаванд. Онҳо ҳаёти минбаъдаи худро ба ин бошгоҳ мепайванданд ва бо мурури замон мо аз онҳо тирандозони номии ТҶММ-ро тайёр менамоем, ки Тоҷикистонро дар арсаи байналмиллалӣ муаррифӣ хоҳанд кард. Мо ҳоло як даста чунин тирандозонро моликем. Сурайё Ҷумъаева яке аз онҳост. Моҳи феврали соли 2005 ӯ дар мусобиқаи байналмиллалии занҳои тирандози давлатҳои мусулмони ҷаҳон барои соҳиб шудан ба Ҷоми Халиҷи Форс, ки дар Ҷумҳурии Исломии Эрон баргузор шуд, иштирок варзида, ҷойи дуюмро гирифт ва ба сари баланд ба БҶВТ баргашт. Моҳи июни ҳамин сол боз дар ҳамин мамлакат барои ба даст овардани ҳамин ҷоии мусобиқаи байналмиллалии давлатҳои мусулмони ҷаҳон баргузор шуд. Дар ин мусобиқа аз БҶВТ се тан: Сергей Бабиков, Марат Абдукаримов ва Олег Набиев иштирок доштанд. Онҳо дар мусобиқаи гуруҳӣ ҷойи якум ва дар мусобиқаҳои инфиродӣ ҷойҳои якум, дуюм ва сеюмро ишғол намуда, соҳиби Ҷоми Халиҷи Форс шуданд. Тоҷикистон дар байни давлатҳои ҷаҳони мусулмонӣ шӯҳратёр гардид.
Дар бозиҳои Олимпие, ки дар Афина шуда гузашт, Сергей Бабиков ба қатори тирандозони ҷаҳон шомил гардид.
Дар баробари вазифаҳои асосие, ки БҶВТ барои Қувваҳои Мусаллаҳи Тоҷикистон ва мақомоти қудратӣ ба ҷо меоварад, мерганҳои моҳир тайёр менамояд, ба камол расонидани варзишгарони моҳири тирандоз ва дар ҷаҳон машҳур гардонидани Тоҷикистони азизи мо мебошад.
Варзиши умдатарини Бошгоҳ таҳти назорат қарор додани фаъолияти машқҳҳои тир мебошад, ки дар вилоятҳо, шаҳрҳо ва ноҳияҳои ҷумҳурӣ арзи вуҷуд мекунанд. Дар ин бахш кори БҶВТ ҳанӯз ҳадафрас нест.
Мо шукри Истиқлолияти давлатӣ мекунем, ки аз баракати он кори Бошгоҳи ҷумҳуриявии варзиши ҳавопаймоиро (БҶВТ) хеле фаъол гардонидем. Бисёр тайёраҳои варзишӣ, фурудгоҳи Фахробод дар асари ҷаҳолат ва бемаслиҳатӣ хароб ва вайрону валангор шуда буданд. Мо тайёраҳоеро, ки захираҳояшон тамом шуда, ё ки имконӣ таъмири асоси кардан надоштаро фурӯхта, пули онро барои барқарор намудани Бошгоҳи мазкур ва намудҳои варзиши ҳавопаймойи, чатрбозӣ (паридан бо парашют), парапланёрӣ, моделсозӣ ва ғайра истифода намудем. Ҳоло Бошгоҳ 5 поя тайёраи АН-2 ва 5 поя тайёрааи ЯК-52 дорад. Аз онҳо 7 поя тайёра фаъол буда, ба машқу тамрин машғуланд. Соли гузашта бо ҳамкории десантчиёни Артиши миллӣ ва ба хотири иҷро намудани чанд вазифаи мушаххас 518 ҷаҳиши парашютӣ ба амал бароварда шуд. Мо мусобиқаҳои парапланёрӣ, моделсозиро аз нав эҳё намудем. Ҳоло дар назди БҶВҲ курсҳои дусолаи барои авиатсияи хурд лётчик тайёркунандаро ташкил кардаем. Он рӯз дур нест, ки ба фарзандони Тоҷикистон дипломи лётчики авиатсияи хурд бо тантана супорида мешавад.
Нақши ТҶММ дар тарбияи ҳарбӣ-ватанпарастии ҷавонони кишварамон хеле бузург аст. Ин тарбия имрӯз шаклҳои мухталифро ба худ касб кардааст. Мо дар як мақола доир ба ҳамаи ҷабҳаҳои фаъолияти Созмони мудофиавӣ нақл карда наметавонем. Тарбияи ҳарбӣ-ватанпарастӣ, шаклҳои маъмули он дар вилоятҳо, шаҳрҳо ва ноҳияҳои мамлакат мавзӯи махсус аст.
Ташкилоти ҷамъиятии мададгори мудофиа имрӯз дар сафҳои худ бештар аз ним миллион нафар ҷавононро муттаҳид сохтааст. Онҳо тайёранд Ватани азизи худро аз дилу ҷон ҳимоя намоянд, пояҳои давлати соҳибистиқлоли тоҷикро, ки понздаҳсолагиашро 9-уми сентябр ботантана ҷашн хоҳем гирифт, таҳким бахшанд, эҳтиёҷоти ба мутахассисони гуногунихтисоси ҳарбӣ доштаи Қувваҳои Мусаллаҳи мамлакатро рафъ намоянд, ба такомули ҷисмонӣ ва низомии ҷавонон, ба омода сохтани даъватшавандагон ба сафи Артиши миллӣ, ба рушду равнақ бахшидани намудҳои гуногуни варзиши техникӣ ва ҳарбӣ-амалӣ ва як силсила масъалаҳои дигар саҳми бориз гузоранд.


Шарикони мо

joomsport nike ea pepsi pepsi

Баннер
Баннер
Баннер